La democrazia á debojëgn de na strotöra: aladó de chësc prinzip á i Vërc condüt ti ultims mëisc n gran prozes de renovamënt. Cun l’aprovaziun de n statut nü y l’eliziun di organs de partí nüs, án chësta fin dl’edema metü les fondamëntes por n svilup organisatif y politich important.
Tratan l’indunada provinziala da incö tl Pfarrheim a Balsan, é la direziun politica di Vërc gnüda renovada cun la lita de dui Co-portausc nüs, la recomposiziun dl Coordinamënt Provinzial Vërt y la nominaziun, por le pröm iade, de na Presidënta. L’assemblea provinziala de chësc ann é la conclujiun positiva de n prozes de partezipaziun tratan deplü mëisc, olache al é gnü lauré fora le statut nü dl partí, aprové en jöbia ai 4 de jügn tla sentada mëmbri.
I dui co-portausc che lascia, Elide Mussner y Luca Bertolini
Cun l’indunada provinziala da incö se röia le mandat de Elide Mussner y Luca Bertolini sciöche Co-portausc di Vërc. Ai é stá protagonisć zentrai dl renovamënt intern, che á acompagné le prozes statutar y l’á sëgn porté a bun fin.
“Al é important che n partí se svilupëies tresfora. I sun porchël contënta da podëi stlü jö le mandat da portausc cun chësc prozes partezipatif de reforma dl statut, n prozes che deura lerch a n svilup politich costrutif tl dagní. I sun sigüda che i dui ‘nüs’ ti proscims agn manajará le partí cun cosciënza y impëgn plëgn”, dij Elide Mussner. “I Verc á na gran desfidá da afronté: ji inant a ester na forza politica buna de afronté chestiuns nöies ince cun de nöies modalités. I lasci chesta inciaria ringrazian dl oportunité y tla convinziun che i Verc doss ji inant senza avei tema da se rinové.”, stlüj Luca Bertolini.
Kathrin Werth y Zeno Oberkofler é gnüs litá co-portausc dl partí
Kathrin Werth é da l’ann 2020 incá aconsiadëssa de comun a Eppan y, da chëra ch’ara é convinta, é ativa te so comun sciöche delegada por les chestiuns europeiches. Ala á tut pert al program Young Elected Politicians dl Comité europeich dles regiuns a Bruxelles y á fat deplü practicums tles istituziuns europeiches, ultimamënter tla Comisciun Europeica.
Zeno Oberkofler, aconsiadú provinzial dl grup Vërc tl Consëi dla Provinzia de Balsan y sëgn Co-portausc, se congratulëia cun süa colega Kathrin Werth, che é gnüda litada danü: I rengraziun nüsc predezessurs por so gran laur. Sëgn podunse afronté deboriada les desfides che nes aspeta, cun forza de na strotöra sterscia. Sciöche forza de renovamënt orunse jí inant cun coraje y crëta, ti don la visibilité nezesciara al laur prezius dles tröpes listes ecosoziales tl raiun.”
Le rode nü dla presidënta: litada Brigitte Foppa
Öna dles novités prinzipales dl statut nü é l’introduziun dla figöra dla Presidënta, che surantolará la rapresentanza legala dl partí y fajará da garanta dl respet di valurs y dles prozedöres dl statut.
Sön proposta dl Coordinamënt Provinzial Vërt é Brigitte Foppa gnüda litada por chësta inciaria. L’aconsiadëssa provinziala y portausc di Vërc por plü agn acompagnará da sëgn inant le partí te chësta funziun de istituziun nöia.
“Dlungia le renovamënt y l’energia s’án ince lascé sintí le bojëgn de stabilité y de na figöra garanta. Chësc ói ester, por alisiré i Co-portausc nüs, i sostigní y ti tigní les sciables lëdies. I le feji por i Vërc de Südtirol, cun chi che i sun liada oramai da vint agn”, dij Foppa.
Coordinamënt provinzial nü Vërt lité
L’Assemblea provinziala á ince lité i delegá tl Coordinamënt Provinzial Vërt, l’organ diretif strategich dl partí. Al é gnü lité: Elide Mussner, Maximilian Gartner, Erica Fassa, Camila Cristofoletti, Thomas Anton Ebenkofler, Rosina Ruatti, Inge Mahlknecht, Nadja Spöttl und Cornelia Brugger.
Cun na strotöra renovada, organs de lita nüs y n statut modernisé, é ii Vërc arjiniá por afronté les proscimes desfides politiches te Südtirol y a livel nazional.
