La cuta de sojornanza por l’svilup di comuns
Nos Verdi Grüne Vërc tolun sö positivamënter la tuta de posizione di ombolc de Corvara y de Sëlva por ciche reverda l’sostëgn dles aministraziuns comunales tres na pert dla cuta de sojornanza.
“L’turism á l’dovëi de se tó sö la responsabilité por la qualité dla vita locala y chësc va bëgn sura la manutenziun di trus y l’organisaziun de evënc fora,” dij Elide Mussner, co-surastanta di Vërc y assessuria al turism dl comun de Badia.
L’Comun de Badia á bele fat n vare concret de chësc vers, cun la delibera n. 41 dl 28 de novëmber dl 2023, destinan l’50% dl aumënt dla cuta de sojornanza al proiet dla nodadoia publica, a benefize dla popolaziun locala y dl turism. Chësta poscibilité é odüda danfora dales desposiziuns dl art. 8 coma 2 dl DPP n. 4/2013, sciöche modifiché dal art. 3, coma 2 dl DPP n. 30 dl 31.08.2023. I inviun la Junta Provinziala a definí normes de atuaziun tleres sura chësta poscibilité, por dëidé i Comuns a fa n vare concret y segü por n sostëgn dles aministraziuns tres la cuta de sojornanza. Por na cosciënza turistica positiva y ecuilibrada tla popolaziun locala, por l’bëgn comun.
