Nöies prospetives: i Vërc dui nü portausc Elide Mussner y Luca Bertolini
Incö damisdé á l’incuntada provinziala di Vërc lité al unanimité i dui nü co – portausc Elide Mussner, assessuria dl comun de Badia, y Luca Bertolini, aconsiadü comunal a Leifers. I dui nü litá surantol l’inciaria da Felix von Wohlgemuth y Marlene Pernstich, co – portausc dal 2019 al 2023. L’inciaria é de dui agn, cina al 2025.
Al se stlüsc n capitul y se deura n nü. Cun Elide Mussner y Luca Bertolini él n talian y na ladina a tó tles mans le partí di Verdi Grüne Vërc. N partí cosciënt de süa importanza tl panorama politich dl Südtirol. Do la gran sbürdla a man dërta rovada tla coaliziun de govern cun partis dla estrema man dërta, sarál fondamental ester na cuntrapert ecuilibrada mo determinada, che ne á nia tëma de dé usc a sües tematiches y a sü valurs.”Nü tëmps, jun inant!”, insciö le tema dla incuntada provinziala vërda che é gnüda tignida in sabeda ai 27 de jená.
Te n clima politich completamënter nü sarál debojëgn de renové ince les strategies y les dinamiches politiches, pur dé ciamó plö forza ales tematiches di Vërc : l’clima, l’ambiënt, la valianza soziala y l’inclujiun, l’economia a mosöra de porsona.”I viun te tëmps de gran insigurëzes, avisa porchël éle important da trasmët crëta y ji inant cun n messaje positif. I orun ester n punt de referimënt pur la defenüda di valurs che da tres se caraterisëia. I sarun chiló pur ascuté sö, pur costruí n dialogh positif pian ia dala basa y ti dán forza ales tröpes energies positives che é bele presëntes söl teritore.”, insciö Mussner.”Le resultat dles ultimes lites provinziales á dé na delujiun ala gran pert dla popolaziun che se desiderëia n Südtirol plö inclusif, plü dlungia ales porsones y al ambiënt, lëde dala morta dles lobby.”, Mussner inant. Pur Luca Bertolini sarál important “pié ia dai teritori y dala presënza danter les porsones. I Vërc á da tres salpü da interpreté les preocupaziuns y les chestiuns plü importantes zënza banalisé o baié ma cun slogan öc. I orun costruí soluziuns. Chësc partí ciara ales proscimes lites comunales y europeiches tla cosciënza de ester na pert determinanta che rapresentëia döt l’eletorat de zënter – man ciampa, na forza bona da governé nostes comunités, sciöche i desmostré te tröc comuns. I nü co – portausc mëna inant la storia de chësc partí ti jon adincuntra cun na nöia manira ai tëmps che i viun. “
L’incuntada provinziala á ciaré inant mo á ince ciaré zoruch : le salüt de Brigitte Foppa ala cariera politica de Riccardo dello Sbarba é sté n momënt de gran emoziun. L’ex aconsiadú provinzial lascia na eredité che sará ciamó de ispiraziun pur les generaziuns dl dagní. I portausc che lascia, Felix von Wohlgemuth y Marlene Pernstich é gnüs saludá dai nü aconsiadus provinziai, Madeleine Rohrer y Zeno Oberkofler, che á rengrazié i dui pur le tëmp y l’impëgn dediché te chisc agn al laur dl partí.
