Cuta de sojornanza por i comuns: da öna na pert ite, dal’atra fora
Le 10% dla cuta de sojornanza che i comuns pó se tigní, aladô dla delibera nr. 1015 di 12.11.2024, s’un sciampa indô fora tres les desposiziuns nöies sön le finanziamënt di comuns aproades de messé.
Cun les desposiziuns nöies sön le finanziamënt di comuns á le govern provinzial danter l’ater fat fora che le 10% dla cuta de sojornanza che i comuns ne ti trasferësc nia plü ales organisaziuns turistiches gnará porchël trat jö dal finanziamënt ch’ai ciafa dala Provinzia. Porchël, do ti avëi conzedü, danter tröpes polemiches, n “bonus” sön la cuta de sojornanza, tol la medema Junta provinziala sëgn n provedimënt che ti al lascia indô sciampé dala “porta de sorvisc” fora. N comportamënt che la dij lungia. Orunse o n’orunse nia ciafé na soluziun costrutiva por afronté la desfida turistica atuala tla provinzia?
“Dantadöt i comuns dër turistics y i “comuns hot-spot” vëgn metüs ala proa dal gran aflus de porsones che mëss gní manajades y á porchël debojëgn de infrastrotöres che funzionëia bun y ega da bëre, mëss desgorje le refodam y se möie.”, dij Elide Mussner, co-surastanta di Vërc y aconsiadëssa a Badia. Garantí döt chësc costa scioldi, che vëgn en gran pert paiá dai zitadins. L’ejëmpl de Badia é tler: n comun cun 3.500 abitanc y feter 11.000 lec turistics, lapró ciamó chës 600 secundes ciases. Tratan la sajun alta mëss le Comun porchël garantí sorvisc por incër 15.000 abitanc, na picia cité.
I ombolc, dantadöt chi di comuns ladins, s’â batü tratan l’ultima legislatöra por podëi se tigní na pert dla cuta de sojornanza propi por fá frunt ales spëises de gestiun. Incö vëgni indô tradis dales desposiziuns nöies sön le finanziamënt di comuns. Insciö ne miorëia la situaziun daldöt nia. La politica provinziala n’é nia bona da se delibré dala smorzia dl setur turistich: pornanche chësc fej oposiziun, zedera.
I sun rová a n punt dl svilup turistich olach’i messun ciafé respostes ales gran domandes: de che é pa nosta lerch vitala? Co podunse pa porté inant na bona cualité de vita? Por podëi ti dé na resposta concreta a chëstes domandes á i comuns debojëgn de scioldi. Scioldi che le govern provinzial y le setur turistich ne pé nia orëi investí por le bëgn de düc.
